Ciencies. Cartafueyos Asturianos de Ciencia y Teunoloxía

Sumario

2025-11-03T13:37:21+01:00

Los númberos primos. Teoremes y conxetures

2025-11-03T13:45:51+01:00

Hai delles selmanes tuvi ordenando una riestra de carpetes nes que guardo artículos estremaos de física y matemática. Yeren artículos que salieron d’internet y qu’imprimiera pa lleelos (o non) con calma. Ente ellos taben les notes d’una conferencia que dio en 2007 Terence Tao, Medalla Fields en 2006, Premiu Princesa d’Asturies de les Ciencies 2020 y ún de los matemáticos actuales más destacaos. El títulu de la ponencia ye «Estructura y aleatoriedá nos númberos primos». Anque les notes son bastante esquemátiques, paeciéronme un bon resume de lo que sabemos al rodiu de los númberos primos y tamién de les sos aplicaciones. El tema de los númberos primos siempre me llamó muncho l’atención y rápido quixi saber cómo d’actuales yeren los resultaos que Tao presentaba. Dempués d’una busca n’internet, l’ayuda del ChatGPT y la llectura d’unos pocos llibros, llegué a tener una idea de cuál yera l’estáu anguaño, en 2025, de los nuesos conocimientos al rodiu de los númberos primos y decidime a escribir (a lo primero pa ordenar les mios idees) un resume d’ellos.

La narcolepsia na etapa infantil y xuvenil

2025-11-03T15:54:54+01:00

La narcolepsia ye un trestornu neurolóxicu raru ya invalidante carauterizáu por una desregulación de les llendes ente’l sueñu y la vixilia. Si bien ye poco frecuente, ocasiona un impautu considerable na vida diaria del paciente, sobre manera si falamos d’ello na edá infantil. Básicamente presenta los mesmos síntomes que nos adultos, pero con delles carauterístiques diferenciadores que van tratase más alantre.

¿Ú tán les coraes del planeta?

2025-11-03T16:01:48+01:00

Les viesques tropicales, y cualesquier viesca en xeneral, suelen considerase los «pulmones del planeta» por mor de la so capacidá p’absorber dióxidu de carbonu y producir oxíxenu. Sicasí, esta interpretación que ta tan arraigonada socialmente ye en realidá un falsu mitu que poco tien que ver col conocimientu científicu del que disponemos anguaño.

El llixiviáu d’arsénicu nes escombreres de les mines de mercuriu en Ḷḷena

2025-11-03T16:07:46+01:00

Por bien de sieglos la minería foi un sector clave de la economía y una seña d’identidá d’Asturies. La trescendencia qu’algamaron les mines de carbón na segunda metá del sieglu XX, que convirtieron al territoriu na mayor área minera d’España, nun pue escurecer la importancia que tamién tuvo equí la minería de recursos metálicos. Magar que na actualidá, a esceición del oru, estes esplotaciones tean inactives esperando por condiciones más favoratibles, na rexón hubo mines de materiales estremaos: manganesu, fierro, cobre, plomu, cinc, cobaltu, níquel, wolframiu, estañu, molibdenu, antimoniu, arsénicu y, sobre manera, mercuriu. Asturies1 foi’l segundu productor d’España de mercuriu, depués d’Almadén, y llegó a producir el 5 % del mercuriu a nivel mundial a finales
de los años 60 del sieglu pasáu. Sicasí, el preciu d’esti metal cayó tanto que toles esplotaciones foron zarrando adulces y, la última mina, La Soterraña, cesó la so actividá en 1974.

Naturalización urbana y dellos exemplos en Xixón

2025-11-03T16:21:06+01:00

Dende que’l ser humanu entamó la construcción de cases pa la so sobrevivencia empezó a quita-y terrén a la naturaleza. Sicasí, ello nun quita pa que s’incluyeren elementos vexetales nes nueves edificaciones. L’orixe de l’agricultura allúgase en Mesopotamia ente los ríos Éufrates y Tigris, nel Creciente Fértil, gracies a los sistemes de riegu que facíen productives aquelles tierres seques. Nesa zona va dase la primer civilización culta del mundu: la sumeria, siendo Babilonia una de les ciudaes-estáu a les que va dar orixe esa civilización. Babilonia, de la que son referente los xardinos colgantes, que representa con claridá la incorporación de los elementos vexetales a les conurbaciones n’edaes civilizatories tan tempranes.

Los lliques urbanos como ferramienta pa la reflexón educativa al rodiu de la calidá del aire na nuesa ciudá. Un ensayu n’Uviéu

2025-11-03T16:27:42+01:00

La calidá del aire, elementu d’esmolición ambiental nes ciudaes.

La esposición a la contaminación atmosférica ambiental asóciase con una medra importante na morbilidá y mortalidá (Cohen et al., 2017). Cierto ye que n’Europa hubo una reducción importante d’emisiones nes ciudaes no que llevamos de sieglu, algamando valores compatibles colos niveles de regulación europeos d’anguaño, pero no referente a les partícules de tamañu pequeñu (PM2,5), anguaño, más del 40 % de les estaciones de midida n’Europa nun algamen les llendes que deberíen tener en 2030, y namás un 8 % cumple coles llendes actuales de la OMS pa la proteición de la salú humana (EEA, 2025). Esti amenorgamientu nos niveles permitíos de contaminantes atmosféricos xeneró una disminución na contaminación qu’implica una reducción del númberu de muertes estimaes venceyaes a la respiración d’eses partícules na población urbana europea (Sicard et al., 2021), anque siguen representando una mortalidá prematura añal pa más d’un cuartu de millón de persones na Xunión Europea (EEA, 2023).