Lletres Asturianes

De l’amor per la paraula: Estudis en homenatge al professor José Enrique Gargallo Gil. Álvarez-Pérez, X. A.; Menéndez-Fernández, C. E. (Eds.) (2026). Barcelona: Edició electrònica (https://doi.org/10.5281/zenodo.20360044), 646 pp.

Fernando Sánchez Miret — 2026-10-30

Ensin resume

Sensibilidá intercultural y diversidá: l’allugamientu del futuru profesoráu n’Asturies

Ángel Huguet-Canalís — 2026-10-30

Asitiaos nel marcu de la Teoría de l’Aculturación, el presente estudiu analiza les preferencies d’aculturación y aculturación llingüística, la sensibilidá intercultural, les actitúes llingüístiques y la ideoloxía multicultural de los futuros docentes que cursen el Grau de Maestru n’Educación Primaria na Universidá d’Uviéu, atendiendo tamién a les posibles diferencies ente los y les qu’escoyeron la Mención de Llingua Asturiana y los y les que cursaben el restu de les menciones (Educación Especial, Educación Física, Educación Musical y Llingua Estranxera: Inglés). Participaron 131 estudiantes (89 de tercer cursu y 42 de cuartu), de los que 33 cursaben la Mención de Llingua Asturiana y 98 otres menciones. Aplicóse un cuestionariu de preferencies d’aculturación y aculturación llingüística hacia descendientes de rumanos y marroquinos, sensibilidá intercultural, actitúes llingüístiques hacia’l rumanu y l’árabe ya ideoloxía multicultural, esta cabera analizada a partir de la discriminación-racismu, los estereotipos y l’amenaza percibida. Los resultaos amosaron asociaciones elevaes ente les preferencies espresaes hacia dambos colectivos, rellaciones positives ente sensibilidá intercultural y actitúes llingüístiques y asociaciones significatives ente los distintos componentes de la ideoloxía multicultural. Per otra parte, nun se detectaron diferencies significatives sistemátiques ente los y les que cursaben la Mención de Llingua Asturiana y los y les que cursaben el restu de les menciones. La principal escepción apaeció nos estereotipos hacia los descendientes de rumanos, que resultaron más positivos ente l’alumnáu de la Mención de Llingua Asturiana. Estos resultaos ponen de manifiestu la necesidá de siguir afondando nos factores culturales y llingüísticos que configuren el posicionamientu del futuru profesoráu ante la diversidá y de treslladar esti conocimientu a los sos programes de formación.

Les lliteratures pequeñes na lliteratura comparada: l’autotraducción y los usos menores nes llingües mayores

Raquel Fernández Menéndez — 2026-10-30

Nesti artículu esploro lo que’l casu asturianu aporta al analís de les lliteratures pequeñes desarrolláu pola lliteratura comparada nes últimes décades. Recupero les principales contribuciones teóriques al rodiu del conceptu en rellación cola minorización llingüística y ofrezo una llectura nueva d’Historia universal de Paniceiros (2002), de Xuan Bello, el testu de mayor alcance ente los traducíos del asturianu al español. En primer llugar, defendo que’l conxuntu recupera dende la creación lliteraria delles característiques señalaes como propies de les lliteratures pequeñes dende que Franz Kafka les definiera nel so diariu —la existencia de ciertos temes comunes a toes, el so calter desterritorializáu o la falta d’una tradición asentada—. En segundu llugar, recurro a l’autotraducción dende una llingua minorizada (l’asturianu) a una llingua mayor (l’español) pa esplorar si, como planteguen Gilles Deleuze y Félix Guattari, una «lliteratura menor» pue ser la qu’una minoría fai nuna llingua dominante, lo que supón examinar los rastros de minorización na versión castellana d’Hestoria universal de Paniceiros. En definitiva, pretendo sorrayar la rellación íntima ente traducción y creación, lliteratura comparada y lliteratura auto/traducida, col oxetivu d’acabar con una comprensión de la historia de la lliteratura asturiana zarrada en sí mesma o dependiente de les grandes lliteratures que la arrodien, y introducir la lliteratura nesta llingua nel discutiniu comparatista del sieglu XXI.

Cuestiones de traductoloxía aplicaes al asturianu

Miguel Fernández Díaz — 2026-10-30

Dende la perspeutiva del asturianu, esti escritu tresllada a esta llingua los aspeutos más fundamentales de la traductoloxía, un campu d’estudiu que sigue medrando ente los diversos estudios filolóxicos asturianos. Ensin buscar una sistematicidá propia d’un manual de traducción al usu, esti trabayu recueye de manera xeneral los conteníos de la disciplina mentada con un enfoque descriptivu dafechu. Primero, inclúyense unes considerances teóriques previes sobre los estudios de traducción en xeneral pa reforciar l’averamientu a un analís traductolóxicu prototípicu: la noción d’equivalencia, la invariable y la unidá de traducción, les distintes téuniques y estratexes traductores o los problemes y errores de traducción. D’igual manera, amiéstase un repasu perriba de la historia de la traducción n’asturianu, necesariu pa la comprensión de les tendencies contemporánees sobre les qu’anguaño s’echen andar nuevos proyeutos. Nel casu del paradigma asturianu, la traducción vien condicionada por cuestiones de tipu sociollingüísticu qu’afeuten tanto a la comunidá de falantes como a la so actividá traductora; ponse equí’l focu sobre la diglosia, ún de los axentes principales na configuración actual del idioma al respeuto del oficiu traductor. A lo cabero, l’artículu ufierta analises de delles traducciones asturianes pa exemplificar les idees anteriores cola mayor claridá posible. Les amueses apurríes sáquense sobre manera d’obres lliteraries bien conocíes.

Reduplicación verbal d’afirmación enfática n’asturianu

Imanol Suarez-Palma — 2026-10-30

La reduplicación verbal d’afirmación enfática (RVAE) ta enforma discutida pal portugués européu (Martins, 2007; 2013) y, más de recién, pal español rioplatense (Silva, 2024), onde s’amosó que constitúi una instancia sintáuticamente estructurada de realización de copies múltiples y non una simple repetición discursiva. Sicasí, hasta güei, esti fenómenu nun se describió nin s’analizó de manera sistemática pal asturianu. Nesti trabayu ufierto la primera descripción empírica detallada de la RVAE n’asturianu, documentando la so distribución al traviés de dellos tipos de predicaos, perífrasis verbales y contestos discursivos, con atención especial al so usu como respuesta a entrugues de sí/non. A partir de nuevos datos elicitaos y observacionales, amueso que l’asturianu nun s’axusta exautamente nin al patrón del portugués européu nin al del español rioplatense: permite la reduplicación llocal axacente en contestos enfáticos correutivos (especialmente como respuesta a entrugues negatives y «de coletilla»), pero tamién como respuesta enfática apropiada a entrugues afirmatives o, inclusive, como confirmación enfática d’afirmaciones positives. Defendo que l’análisis xenerativu de doble copia llocal propuestu por Silva (2024) pa la RVAE del español rioplatense pue estendese al asturianu, lo que suxer que l’asturianu taría nuna posición intermedia nun continuu románicu de movimientu verbal a la periferia izquierda y la realización de copies. Estes conclusiones afinen la nuesa comprensión de cómo interaicionen la reduplicación, la polaridá y el discursu dende una perspeutiva interllingüística dientro de les llingües romániques.

La distinción ente nomes contables ya incontables y la metafonía n’asturianu y nes fales del centru y sur d’Italia

Michela Russo — 2026-10-30

Esti estudiu analiza cómo interactúen la fonoloxía y la morfoloxía na espresión de la distinción ente nomes contables ya incontables n’asturianu, con atención especial a la metafonía, y ufierta una perspeutiva comparativa coles fales del centru y sur d’Italia. Trázase la evolución histórica de los marcadores d’indeterminación nes llingües romances tres la perda de la declinación del llatín —sobre manera del neutru— y amuésase cómo esa perda dio llugar a nueves estratexes morfofonolóxiques pa codificar la indeterminación. Lo más relevante ye que l’estudiu defende que, nestes variedaes romances, la indeterminación en neutru y la referencia a nomes incontables confluyeron nuna única categoría gramatical, espresada per aciu de patrones flexivos distintos y procesos fonolóxicos específicos. En particular, el neutru realízase como ausencia de metafonía, frente a les alternancies metafóniques que carautericen a les formes singulares contables (xeneralmente masculines). Esta confluencia ufierta una visión sobre cómo les alternancies fonolóxiques pueden actuar como marcadores de distinciones sintáutiques y semántiques nel ámbitu nominal. Un enfoque clave ye’l papel de la metafonía, un procesu fonolóxicu desencadenáu poles vocales altes finales, que xuega un papel esencial na señalización de les oposiciones de xéneru y númberu. L’estudiu cuestiona les conceiciones fonolóxiques tradicionales al demostrar cómo la metafonía pasó a desempeñar una función sintáutica y morfolóxica. La metafonía n’asturianu interactúa cola morfoloxía flexiva, marcando’l masculín singular y contribuyendo a la distinción de pluralidá dientro de la oposición ente nomes contables ya incontables. El trabayu identifica patrones morfofonolóxicos específicos que diferencien los nomes incontables de los nomes masculinos y femeninos basándose n’alternancies vocáliques metafóniques y patrones d’alcuerdu nes frases nominales. Los resultaos suxeren que les distinciones contable/incontable tienen base léxica, pero implémentense per aciu procesos sintáuticos y fonolóxicos. Amás, los desarrollos paralelos n’asturianu y nos dialeutos italianos indiquen una evolución converxente d’estratexes morfofonolóxiques pa espresar pluralidá ya indeterminación. Esta comparanza ente llingües sorraya la interdependencia ente fonoloxía y morfoloxía na configuración de les categoríes gramaticales nes llingües romances.

Observaciones sobro léxicu y etimoloxía al sur del dominiu asturianolleonés

Pascual RIESCO CHUECA — 2026-10-30

Nun se detecta una continuidá sólida nel léxicu de les fales asturianolleoneses, darréu qu’hacia’l sur del dominiu ye intensa, dende tiempos medievales, la entrada de castellanismos y lusismos, que se sobreponen a un sustratu poco documentáu. La complexa historia del procesu repoblador nesta parte meridional del dominiu crea un sincretismu bayurosu pol averamientu de les variantes que traíen los repobladores. Les sos fales amiéstense, asina, al caudal principal, que vien dende’l norte. Los anovamientos van abriendo camín alteriando mesmo la fonética qu’al traviés de sinonimies de sustitución. El desgaste de les comunidaes campesines, que diben minándose por una emigración intensa, pon en peligru tou esi llegáu. Davezu, dalgunes families léxiques sobrevivieron con dificultá, cuasi algamando l’estatutu del hápax, o con desendolques semánticos sorprendentes, propios de la poca vida que calteníen. L’estudiu comparáu amuesa señales interesantes sobre la historia del léxicu del dominiu.

Cuentos de les 1.001 nueches: la traducción d’El llibru póstumu de Sherezade

Robin Munby — 2026-10-30

Esti artículu analiza la traducción del poemariu El llibru póstumu de Sherezade, de Raquel Menéndez, espublizáu por Skein Press nuna edición billingüe inglés-asturianu col títulu The Posthumous Book of Shahrazad. Partiendo del títulu del poemariu, esti artículu adopta la estructura de Les mil y una nueches pa contar tres «cuentos». En caún d’ellos analízase un momentu distintu del procesu de traducción y un aspeutu diferente de la mesma. «El cuentu de l’ausencia d’un poema» describe’l procesu de busca d’una editorial en llingua inglesa pa la traducción, col envís d’amosar dalgunes de les torgues a les que puen enfrentase les persones traductores de lliteratura al movese pela industria editorial anglófona, les más de les veces poco tresparente. Espérase que la descripción d’esti procesu pueda resultar útil mesmo pa escritores n’asturianu interesaos en conocer cómo la lliteratura asturiana atopa un espaciu n’otres llingües que pa persones que traducen dende l’asturianu o dende otres llingües minorizaes. «El cuentu de les dos Sherezades» analiza con detalle dos determinos concretos tomaos nel procesu de traducción y la manera na que tuvieron condicionaos pola propia suxetividá del traductor. D’esta miente, quier amosase cómo, en cuenta d’intentar alloñase del testu, hai ocasiones nes que’l que traduz pue valise de la so propia suxetividá como ferramienta nel procesu de traducción. P’acabar, «El cuentu de la voz qu’aguanta nel tiempu» da cuenta de la esperiencia de llectura de la persona traductora depués de la traducción y de cómo los poemes de The Posthumous Book of Shahrazad siguieron resonando nes sos propies llectures nos meses posteriores al trabayu de traducción. Esto, de la mesma manera, sirve como exemplu de cómo la traducción amiesta una dimensión nueva a la intertestualidá del poemariu.