Como citar
Resume
Asturies ye un territoriu nel que, poles sos carauterístiques climátiques y xeolóxiques, los movimientos de lladera son mui abondantes. Tanto ye asina que munchos aspeutos del mou de vida tradicional, el folclore o la propia llingua asturiana tán condicionaos por esta particularidá xeolóxica. Na mesma narración llexendaria de la Batalla de Cuadonga, presente en diverses cróniques medievales, l’exércitu musulmán en retirada recibe’l castigu divín en forma d’un gran argayu que sapoza dafechu la tropa. Más allá de l’anéudota, ponse de manifiestu la fuerte influencia del mediu natural sobre les aiciones humanes. Resulta también llamadera, por exemplu, la bayura de vocablos existentes na llingua asturiana pa carauterizar los diferentes tipos d’argayos. Según enumbera’l profesor Xuan Xosé Sánchez Vicente nel so trabayu «Llingua y mundo: dellos aspeutos de la semántica l’agua» (Lletres Asturianes 17), son múltiples los tipos d’argayos en función de diversos factores: […] Los argayos de ñeve denómense: nenigu, ebanu, adene, azne, adiga, trabe, xostra; zaparrastrada (segunda acepción) llámase al argayu de ñeve que cai contra daqué; falisgada, al argayu de ñeve que s’esñidia enriba otru más duro; neveriu al que s’anuncia con roíu de morrillos; puveriu al que cai ensin roíu. Los argayos de tierra puen llamase fana/ faina, argayu/argaxu, traponada, xostra, arba, arroxu, empolla. Un fanu, un fanizu y un farpazu son argayos de menor tamañu. esfanar, argayar /argaxar, arbar señalen l’acción de producise un argayu. […] Fana ocurrida’l 27 de mayu de 2007 afeutando a la N-634 al so pasu pel Conceyu de Valdés. Semeya: Carlos López Fernández D’igual miente, son mui frecuentes en territorio asturianu los topónimos relativos a argayos y fanes y nos que munchos d’ellos dan nome a llugares claramente propensos a sufrir esti tipu de fenómenos. Tolo anterior ye’l reflexu d’una conocencia fonda del fenómenu de los argayos, frutu de la estrecha convivencia ente los xeitos de vida tradicionales y el mediu natural, que fixo posible a los nuesos antiguos xestionar el riesgu deriváu, o inclusive creyar moos d’asociación comunal, como la sestaferia, pa iguar daños xeneraos por esti frecuente fenómenu natural y llevar alantre les imprescindibles reparaciones. Sicasí, énte los camudamientos sociales esperimentaos pol medio rural, l’avieyamientu y mengua de la población, too esti caudal de conocencia cuerre’l peligru de desapaecer. Ye necesario, polo tanto, utilizar los medios de güei al nuesu algame pa continuar afondando nesta materia y abordar el problema dende nuevos planteamientos.