Los microARN reguladores de les enfermedaes humanes. Relevancia funcional y patolóxica de la cara "oculta" del xenoma
PDF (Español)

Como citar

Menéndez Caravia, X. (2016). Los microARN reguladores de les enfermedaes humanes. Relevancia funcional y patolóxica de la cara "oculta" del xenoma. Ciencies. Cartafueyos Asturianos De Ciencia Y Teunoloxía, 6(6). Retrieved from https://reunido.uniovi.es/index.php/CCACT/article/view/11399

Resume

La historia de la vida escríbese nun llinguax químicu dende hai más de 3.800 millones d’años. Les primeres formes de vida qu’apaecieron fueron les bacteries, y estos organismos vienen esistiendo de forma individual d’entós p’acá. Sicasí, hai aproximadamente 2.000 millones d’años entamaron a amestase unes con otres, formando entós les primeres célules eucariotes. Estes célules, que son les que formen la mayor parte de los seres vivos que somos a ver, como los animales, les plantes o los fungos, son enforma más complexes que les cencielles bacteries, cola principal carauterística de que tienen un noyu nel qu’agospien el material xenético. Les célules eucariotes caltuviéronse independientes hasta hai 610 millones d’años, momentu nel que s’asociaron formando los organismos pluricelulares complexos. Estes nueves formes de vida cooperativa traxeron cambeos importantes a nivel biolóxicu. Hasta esi momentu les célules esistíen de forma aisllada y nun facíen namái que crecer y dividise, pero entós entamaren a estremase unes d’otres, a repartise les estremaes xeres y, llegáu’l casu, a sacrificase pol bien común. Foi asina como se semó la grana de lo que surdió tola diversidá d’organismos vivos que conocemos anguaño (Cavalier-Smith 2006). Magar la gran complexidá esistente, tolos organismos vivos empleguen un númberu perpequeñu de molécules p’almacenar la información y pa facer les principales funciones biolóxiques, ye dicir, hai una unidá química nel mundu vivu. Asina, la información xénetica, les instrucciones pa ser lo que somos daveres, allúgase nel noyu de les célules en forma d’adn (ácidu desoxirribonucleico). Esti material ye lo que nomamos como xenoma, ye dicir, el conxuntu de xenes d’un organismu, o les instrucciones moleculares pa facer un ser vivu. Pero la información xenética nun tuvo codificada siempre nuna molécula d’adn, sinón que s’estima que les primeres formes de vida surdieron por aciu d’una molécula mui paecida, l’arn (ácidu ribonucleico). Les molécules d’arn son muncho más afayadices pa desendolcar distintos tipos de xeres, pero a espenses de ser muncho más fráxiles. Poro, la molécula d’adn, muncho más estable que l’arn, acabó ocupando’l papel de soporte de la información xenética. Sicasí, la llectura ya interpretación d’esa información, dientro de toles célules conocíes, pasa peles manes de distintes molécules d’arn. Asina, l’arn mensaxero sirve d’intermediariu nel que se copia la información perpedel adn y viaxa hasta los ribosomes, nel citoplasma celular, tamién formaos por otru tipu d’arn. Ellí, la información xenética tórnase en proteínes por aciu d’otru tipu más d’arn, el de tresferencia, que ye responsable de la interpretación del códigu xenéticu compartíu por tolos seres vivos. Les proteínes son les que mayoritariamente desempeñen les estremaes funciones biolóxiques (tanto estructurales como catalítiques), constituyendo les ferramientes coles que funciona la vida. Esti fluxu de la información describiólu Francis Crick nel añu 1970, constituyendo’l Dogma Central de la Bioloxía Molecular. Crick (1970) afitó la unidireicionalidá de la información xenética y el perfeutu acoplamientu de tolos procesos.

PDF (Español)