Dellos datos sobre les Holoturies d'Asturies
PDF (Español)

Como citar

Fernández Rodríguez, I. (2016). Dellos datos sobre les Holoturies d’Asturies. Ciencies. Cartafueyos Asturianos De Ciencia Y Teunoloxía, 6(6). Retrieved from https://reunido.uniovi.es/index.php/CCACT/article/view/11400

Resume

Les holoturies, tamién llamaes morciyes  o formigones–ensin xustificación, porque son inofensives y nun aformiguen nada–, son una clas d’invertebraos marinos dientro del filu Equinodermos (Filu Echinodermata: Clas Holothuroidea), al igual que les estrelles de mar o roncheles, les ofiures, los oricios y los llirios de mar (clases Asteroidea, Ophiuroidea, Echinoidea y Crinoidea). Como tolos Equinodermos (el so nome quier dicir «pelleya espinoso») son animales deuterostomaos (nel desendolcu embrionariu’l blastoporu da llugar al anu) y celomaos (con una cavidá interna nel so cuerpo llamada celoma), con simetría billateral na so fas llarvaria que deriva en simetría radial pentámera nel adultu. El so cuerpu ta allargáu según la exa oral-aboral y tienen musculatura llonxitudinal y circular na so parede corporal. Tienen un sistema vascular acuíferu d’aniciu celómicu que llenen y vacien d’agua (introducío nel celoma pela cloaca) per mediu d’un madreporitu internu que s’alcuentra nel celoma (al contrario de lo qu’asocede nel restu d’equinodermos, nos que’l madreporitu ye esternu). Esti sistema manifiéstase esternamente polos pies ambulacrales muscularizaos pa la llocomoción, que sobresalen de la superficie corporal: nes holoturies tán más desendolcaos nos tres radios ventrales (trívium), a los que se llama «pedicelos», que los de los dos dorsales (bívium), a los que se-yos noma davezu «papiles » (Ruppert & Barnes 1996). Nes holoturies, el sistema acuíferu conflúi na parte anterior en raxos orales, que puen ser: peltaos, dendroides, pinnaos o dixitaos. Los raxos sirven pa l’alimentación del animal yá que garren partícules en suspensión nel agua o del sedimentu pola mor del mucus que los recubre y llueu la holoturia introduz los raxos na so boca pa inxerir esi alimentu. Al llau de la canal anular del sistema vascular acuíferu tienen les denomaes vesícules de Poli en númberu variable. La so función ye almacenar agua p’ayudar a caltener una presión óptimo dientro del animal. El so endoesqueletu ta fechu d’osículos calcáreos dérmicos microscópicos que se denomen escleritos y tán mui reducíos ya inmersos nuna dermis de consistencia variable. Puen presentar formes estremaes y constitúin un caráuter taxonómicu importante. Nun tienen muérganos escretores definíos y tienen un sistema nerviosu difusu formáu por una rede nerviosa, un aniellu nerviosu perioral y nervios radiales. Tienen árboles respiratorios, compuestos por dos tubos arborescentes, que comuniquen al esterior pela cloaca; bombien agua al interior pa cumplir funciones respiratories y escretores. Al igual que’l restu de los equinodermos, les holoturies tienen una gran capacidá de rexeneración: puen llegar a eviscerase completamente pel anu y rexenerase dafechu; el centru de rexeneración ta cercanu a la cloaca. Sicasí, primero d’echar los muérganos internos, hai holoturies que tienen los llamaos túbulos de Cuvier na parte de la cloaca, y evácuenlos pa safar de depredadores. Son viscosos y puen contener toxines, como la holoturina (que s’utiliza n’humanos como anestésicu) (Ruppert & Barnes 1996). Dalgunes holoturies intermareales ya infrallitorales son d’interés comercial. Nel este y sudeste asiáticu son un platu perconocíu y apreciáu: conócense como trepang en malayu, namako en xaponés, y balatán en tagalu. Úsense, inclusive, como reconstituyentes y afrodisiacos na medicina tradicional china. N’España tamién se consumen en zones como Cataluña, Valencia o les Baleares, onde se conocen como espardenyes 'alpargates', y el preciu ta alredor de los 140 €/kilo, convirtiéndoles nun manxar al altor de les angules.

PDF (Español)