Los númberos primos. Teoremes y conxetures

Abstract

Hai delles selmanes tuvi ordenando una riestra de carpetes nes que guardo artículos estremaos de física y matemática. Yeren artículos que salieron d’internet y qu’imprimiera pa lleelos (o non) con calma. Ente ellos taben les notes d’una conferencia que dio en 2007 Terence Tao, Medalla Fields en 2006, Premiu Princesa d’Asturies de les Ciencies 2020 y ún de los matemáticos actuales más destacaos. El títulu de la ponencia ye «Estructura y aleatoriedá nos númberos primos». Anque les notes son bastante esquemátiques, paeciéronme un bon resume de lo que sabemos al rodiu de los númberos primos y tamién de les sos aplicaciones. El tema de los númberos primos siempre me llamó muncho l’atención y rápido quixi saber cómo d’actuales yeren los resultaos que Tao presentaba. Dempués d’una busca n’internet, l’ayuda del ChatGPT y la llectura d’unos pocos llibros, llegué a tener una idea de cuál yera l’estáu anguaño, en 2025, de los nuesos conocimientos al rodiu de los númberos primos y decidime a escribir (a lo primero pa ordenar les mios idees) un resume d’ellos.