Sistema d’evaluación
La revisión por pares ye un elementu fundamental del procesu d’espublizamientu científicu y del desarrollu d’un conocimientu académicu fiable, calidable, rigorosu y que se puea comprobar. Los artículos evaluaos por persones espertes dan mayor solidez al métodu científicu y son un espeyu de la calidá de la investigación y de les instituciones que la sofiten. Poro, ye imprescindible afitar principios éticos y criterios de bones práutiques editoriales que garanticen el rigor y la calidá del procesu, amás de la integridá y tresparencia de toles partes implicaes nel procesu d’asoleyamientu y circulación del conocimientu científicu.
Lletres Asturianes aplica un procesu d’evaluación científica esterna por pares en réxime de doble ciegu col envís de garantizar la calidá académica, el rigor investigador, la honestidá científica y la oxetividá na seleición de los trabayos espublizaos. Esti sistema supón que la parte autora nun conoza la identidá de la parte evaluadora de los manuscritos y que la parte evaluadora nun reciba información sobre l’autoría de los trabayos mandaos a revisión. El procedimientu d’evaluación aplicable a cada tipu de contribución tendrá d’afayase a la so naturaleza y tien de tar identificáu espreso na información editorial de la revista.
Receición y valoración inicial
En recibiendo’l documentu, l’Equipu Téunicu Editorial y la Direición fadrán una primer revisión pa comprobar si la temática del trabayu casa cola de la revista y si se cumplen les normes de presentación y los criterios mínimos de calidá científica y ética editorial. Los testos que nun s’axusten al perfil temáticu de la revista o que presenten problemes formales o metodolóxicos graves podrán refugase nesta fase ensin pasar a la evaluación esterna.
Correspuénde-y a la Direición, sofitada pol Equipu Téunicu Editorial de la revista, determinar la seición na que s’integrará cada manuscritu d’acordies col so calter, conteníu y encaxe na estructura editorial de Lletres Asturianes. Esti determín pue tomase al recibir l’unviu tres de la valoración primera del trabayu o tres del procesu d’evaluación arriendes de los determinos que resulten d’esti.
Evaluación de los trabayos según la seición
El procedimientu d’evaluación o valoración de les contribuciones a Lletres Asturianes depende de la seición a la que se destinen. En tolos casos, los trabayos tendrán d’axustase a les normes de publicación y al marcu editorial y éticu de la revista.
Los manuscritos presentaos a «Trabayos d’investigación» sométense al procesu ordinariu d’evaluación esterna por pares en réxime de doble ciegu, pa valorar la so calidá científica, orixinalidá y contribución al conocimientu nos ámbitos temáticos propios de la revista.
Los trabayos empobinaos a «D’otramiente» evalúense editorialmente. La Direición, col sofitu del Conseyu de Redaición y, de precisalo, del Equipu Téunicu Editorial, valora la so adecuación a la llinia editorial y decide sobre’l so espublizamientu. Polo regular, estos trabayos nun se someten al procesu ordinariu d’evaluación esterna; sicasí, en función del so calter o conteníu, la Direición pue determinar la conveniencia d’una evaluación esterna especializada.
Les «Reseñes bibliográfiques» son oxetu de valoración editorial pola Direición, col sofitu del Conseyu de Redaición y, si fixere falta, del Equipu Téunicu Editorial. Esta valoración atiende al interés científicu o disciplinar de la publicación reseñada, al calter críticu de la contribución y a la so adecuación a la llinia editorial de la revista. La decisión sobre’l so espublizamientu correspuénde-y a la Direición.
L’inxerimientu de trabayos a «Artículos recuperaos» respuende a una seleición de la Direición y del Conseyu de Redaición, basada nel so valir científicu, históricu o disciplinar y na so condición d’aportaciones de referencia pal estudiu de les llingües, la lliteratura y la cultura asturianes. Esta seición recueye trabayos publicaos nel pasáu pola Academia de la Llingua Asturiana y nun tien una convocatoria abierta de manuscritos.
Anonimatu y seleición de persones evaluadores
Cola fin de garantizar la imparcialidá del procesu d’evaluación, los manuscritos unviaos pa revisión científica tendrán de presentase anonimizaos y ensin elementos que permitan identificar de manera direuta o indireuta l’autoría del trabayu.
Los manuscritos unviaos a evaluación científica esterna que superen esta primer revisión van unviase a persones especialistes con competencia investigadora acreitada, ayenes a los órganos editoriales y científicos de la revista y ensin conflictos d’interés que puean comprometer la independencia de la evaluación.
Con estos criterios, afítase un procesu editorial respetuosu cola confidencialidá de los manuscritos y cola identidá de les persones que participen nel sistema d’evaluación por pares. Pa ello, la Direición y l’Equipu Téunicu Editorial habrán mirar pola seleición d’evaluadores con competencia investigadora acreitada, ayenos a los órganos editoriales y científicos de la revista y ensin posibles conflictos d’interés que puean afeutar al procesu de revisión científica.
Materiales complementarios sometíos a evaluación
Cuando’l manuscritu traiga arreyaos datos, corpus, anexos o otros materiales complementarios relevantes pa valorar la investigación, estos podrán formar parte del procesu d’evaluación científica.
Criterios ya informes d’evaluación
Les evaluaciones fadránse acordies con criterios d’imparcialidá, confidencialidá y fundamentu académicu, atendiendo sobre manera a la orixinalidá del trabayu, el so interés y calidá científicos, l’afitamientu metodolóxicu, la correición formal y la relevancia de les sos aportaciones.
Les persones encargaes de la evaluación científica de los manuscritos lleven alantre un llabor fundamental pa la calidá y el rigor académicos y pa la consistencia científica de Lletres Asturianes. La revisión por pares constituye un elementu esencial del procesu editorial y contribuye a crear un espaciu de discutiniu académicu bien afitáu y respetuosu.
Polo tanto, les evaluaciones han facese con criterios d’oxetividá y fundamentu académicu, acordies col interés y la relevancia del trabayu, la so coherencia metodolóxica, la calidá de les contribuciones ufiertaes y la conveniencia del manuscritu a los ámbitos temáticos de la revista. Los informes d’evaluación tienen d’ellaborase de mou razonáu y respetuosu, mirando siempres que les observaciones formulaes contribuyan al ameyoramientu científicu y formal de los testos presentaos.
La revista podrá solicitar la refechura de los informes que nun respeten estos principios, ensin que nenguna intervención editorial puea alteriar el sentíu de la valoración científica emitida pola persona evaluadora.
Confidencialidá, competencia ya imparcialidá
Les persones evaluadores han caltener la confidencialidá de los manuscritos recibíos y de cualesquier información venceyada al procesu editorial. Los testos sometíos a revisión nun podrán utilizase nin asoleyase total o parcialmente enantes del so espublizamientu ensin autorización espresa de l’autoría y de la revista.
Cuando un evaluador o evaluadora considere que nun dispón de la especialización necesaria pal exame del manuscritu o cuando exista dalgún conflictu d’interés académicu, profesional o personal que pudiera afeutar a la imparcialidá de la evaluación, tendrá de comunicalo a la persona de referencia del Equipu Téunicu Editorial y quitase de participar nel procesu de revisión.
Determinos editoriales ya igües
D’alcuerdu colos informes d’evaluación, la Direición, col sofitu del Equipu Téunicu Editorial y, cuando se precise, del Conseyu de Redaición o del Conseyu Científicu Asesor, tomará’l determín editorial correspondiente, que podrá consistir na aceutación del manuscritu, nel pidimientu de correiciones o igües o na refuga xustificada del trabayu. Si hai desalcuerdos sustanciosos ente los informes de les persones evaluadores, la revista podrá pidir evaluaciones complementaries. Cuando nos manuscritos se faigan cambeos o igües fondos dempués de la primer fase d’evaluación y revisión, LLAA podrá unviar el manuscritu a una segunda ronda d’evaluación enantes de tomar un determín definitivu.
Cuando se precise d’ello, la revista podrá pidir aclaraciones, correiciones o evaluaciones complementaries p’asegurar el mayor rigor posible nel procesu d’espublizamientu. Lletres Asturianes actuará con dilixencia énte posibles incidencies ético-editoriales acordies colos principios y procedimientos establecíos na «Guía editorial y ética de Lletres Asturianes».
Comunicación y plazos
Lletres Asturianes mira pola tresparencia y la independencia del procesu editorial y caltién una comunicación razonada cola parte autora a lo llargo de toles fases d’evaluación y publicación. Les decisiones editoriales comuníquense cola so xustificación y, cuando proceda, colos informes d’evaluación y les indicaciones necesaries pa revisar el manuscritu.
La revista fadrá por comunicar los resultaos nel plazu más curtiu posible, ensin perxuiciu de les necesidaes propies de la revisión científica y de la calidá editorial. Pa comunicar el primer determín editorial deriváu de la evaluación esterna, toma como referencia un plazu orientativu de cuatro meses dende la receición del manuscritu. Esti plazu podrá ampliase cuando se precise d’evaluaciones complementaries o se dean circunstancies que torguen la revisión científica nel tiempu establecíu. Esti plazu orientativu nun incluye’l tiempu necesariu pa les correiciones de la parte autora, les posibles rondes d’evaluación posteriores nin la preparación editorial del trabayu.
Independencia y apertura del procesu editorial
La pertenencia a l’ALLA nun constituye por sigo mesma un conflictu d’interés nin va torgar la presentación de trabayos pa la so evaluación o la participación como evaluador o evaluadora, siempres que nun se dean circunstancies que puean comprometer la independencia o imparcialidá del procesu. Les persones integrantes de los órganos editoriales y científicos de la revista podrán presentar manuscritos a LLAA, pero, cuando lo faigan, habrán quedar dafechu al marxe de la so tramitación, evaluación y determín editorial. Tampoco podrán actuar como evaluadores de manuscritos presentaos a la revista.
Cola fin d’atancar situaciones d’endogamia editorial y facilitar l’apertura de la revista a la comunidá investigadora, Lletres Asturianes fadrá por que, nel conxuntu de los cuatro últimos númberos espublizaos, la proporción d’artículos de la seición «Trabayos d’investigación» firmaos por pelo menos una persona que forme parte de los órganos editoriales o científicos de la revista o que participara como evaluadora nos procesos de revisión correspondientes a esi mesmu periodu nun supere’l 20 %. Na aplicación d’esti principiu tendráse en cuenta’l calter especializáu de los ámbitos d’investigación propios de la revista y la circunstancia de que bona parte d’ellos tán venceyaos al estudiu del asturianu y toles disciplines derivaes, un campu que sigue desenvolviéndose y ampliando la so comunidá investigadora. Esta circunstancia nun habrá comprometer l’oxetivu d’apertura y diversificación de la revista, pero tendráse en cuenta cuando la especialización de los trabayos seya una torga pa disponer de persones evaluadores competentes.
