Enfoque y algame
Lletres Asturianes ye una revista científica especializada n’estudios sobre les llingües y la lliteratura asturianes, entendíes nun sen ampliu y na so rellación col ámbitu románicu, amás d’otros ámbitos d’investigación venceyaos cola filoloxía, la sociollingüística, la didáutica, el comparatismu llingüísticu y lliterariu, l’antropoloxía, la traducción, la crítica lliteraria o la cultura asturiana. La revista tien como oxetivu principal puxar pol espardimientu d’investigaciones orixinales y relevantes que contribuyan a enantar el conocimientu científicu nestos campos d’estudiu. D’esta miente, la publicación diríxese primero a la comunidá investigadora y académica interesada nestos ámbitos d’estudiu y ta abierta a contribuciones que vengan de cualesquier institución o ámbitu xeográficu, siempres que s’afayen a la temática y cumplan los criterios científicos y editoriales establecíos.
Con esti propósitu, Lletres Asturianes entiende la so actividá editorial como una ferramienta pa favorecer el diálogu académicu y la circulación internacional del conocimientu al rodiu les llingües, la lliteratura y la cultura asturianes. La revista puxa pola participación de la investigación fecha n’Asturies nos espacios científicos internacionales y empobina l’intercambéu de perspeutives, metodoloxíes, idees y resultaos investigadores con otres estayes académiques y culturales. Acordies con ello, la revista considera’l multillingüismu un valir de la comunicación científica y una vía pa promover mesmo la diversidá llingüística na producción académica que l’espardimientu internacional del conocimientu.
Como publicación científica de l’Academia de la Llingua Asturiana (ALLA), Lletres Asturianes empobina la so actividá a promover, estudiar y esparder les llingües d’Asturies, esto ye, l’asturianu y l’eonaviegu, amás de les sos manifestaciones lliteraries, culturales y sociales. D’esta miente, la revista ayuda a reforciar estes realidaes llingüístiques y la so proyeición académica, siguiendo los principios de pluralidá investigadora y de serviciu a la comunidá académica y a la sociedá.
Entidá editora y cooperación institucional
L’Academia de la Llingua Asturiana, como institución titular y editora de Lletres Asturianes (LLAA), revista científica dixital d’accesu abiertu diamante agospiada nuna plataforma Open Journal Systems (OJS), tien al cargu’l llabor de curiar la calidá científica y ética de la publicación en toles fases del procesu editorial. Asina, Lletres Asturianes emplega nos trabayos d’investigacíón un sistema d’evaluación esterna por pares en réxime de doble ciegu y trabaya acordies colos principios y encamientos internacionales d’ética y honestidá académiques y editoriales, n’especial los establecíos pol Committee on Publication Ethics (COPE), amás de colos estándares de rigor, independencia editorial y tresparencia propios de les publicaciones científiques actuales. Nel ámbitu de la ciencia abierta y la publicación académica diamante, la revista tien tamién como referencia’l Diamond Open Access Standard (DOAS).
Como publicación científica cimera de l’ALLA, la revista entiende’l so llabor editorial como una responsabilidá académica y cultural empobinada a dar puxu y visibilidá a la investigación especializada sobre les llingües, la lliteratura y la cultura asturianes.
Financiamientu ya independencia editorial
La entidá editora de la revista respeta la independencia académica y editorial de Lletres Asturianes. Nesi sen, el sostenimientu económicu y téunicu de la revista intégrase nos recursos institucionales de l’ALLA y nos mecanismos de cooperación establecíos con otres instituciones (Universidá d’Uviéu y el so portal OJS de revistes científiques «REUNIDO»), ensin que les fontes de financiamientu o’l sofitu recibíu puean condicionar los procesos d’evaluación nin los determinos editoriales.
D’alcuerdu cola tresparencia y la imparcialidá declaraes na «Guía editorial y ética de Lletres Asturianes», la publicación nun aceuta nin incluye publicidá comercial nos sos conteníos nin nos espacios editoriales propios de la revista.
Periodicidá ya identificadores
Lletres Asturianes publícase nun periodu semestral a lo cabero de los meses de marzu y ochobre.
e-ISSN: 2174-9612
ISSN: 0212-0534
Llingües d’asoleyamientu
Les llingües principales d’asoleyamientu son l’asturianu y l’eonaviegu, sicasí, espublizaránse tamién trabayos n’otres llingües por razones de calidá científica, interés del tema o proyeición internacional de la investigación.
Esta política reflexa’l compromisu de Lletres Asturianes col desenvolvimientu del asturianu y del eonaviegu como llingües de producción y comunicación científiques. D’esti mou, la revista construye un llugar d’alcuentru ente llingües, tradiciones académiques y comunidaes investigadores. El multillingüismu favorez l’intercambéu de perspeutives y metodoloxíes, enancha les posibilidaes de diálogu y collaboración y empobina la circulación internacional del conocimientu sobre les llingües, la lliteratura y la cultura d’Asturies, calteniendo la diversidá llingüística como un valir de la comunicación científica.
Les llingües vehiculares de la información institucional y editorial de Lletres Asturianes son l’asturianu y l’inglés.
Seiciones editoriales
La estructura editorial de Lletres Asturianes encadármase al traviés de seiciones estremaes que respuenden al calter específicu de les contribuciones y a los oxetivos científicos y editoriales de la revista. Les seiciones «Trabayos d’investigación», «D’otramiente» y «Reseñes bibliográfiques» tán abiertes a la receición de manuscritos. Pela so parte, la seición «Artículos recuperaos» forma parte de la política editorial de la revista pa recuperar, envalorar y esparder el so patrimoniu científicu. Magar que la parte autora pue dirixir el so trabayu a una seición concreta nel propiu unviu, l’axudicación definitiva fadrála la Direición de la revista col sofitu de los órganos editoriales que correspuendan acordies col tipu de contribución.
Trabayos d’investigación
La seición «Trabayos d’investigación» publica artículos científicos orixinales que constituyan una contribución relevante al conocimientu nos ámbitos temáticos propios de la revista.
Los manuscritos presentaos a esta seición pasen el procesu ordinariu d’evaluación esterna por pares en réxime de doble ciegu y tendrán d’axustase a les presentes normes d’espublizamientu y al marcu editorial y éticu afitáu pola revista.
D’otramiente
La seición «D’otramiente» acueye contribuciones de calter filolóxicu, sociollingüísticu, lliterariu, históricu o cultural qu’amplíen los espacios de reflexón y d’alderique alredor de los ámbitos científicos propios de la revista dende enfoques o formatos distintos de los propios del artículu d’investigación. Esta seición ye tamién un espaciu pa dar a conocer afayos o resultaos que puean servir d’encontu a investigaciones futures.
La Direición, col sofitu del Conseyu de Redaición y, de precisalo, del Equipu Téunicu Editorial, valorará la so adecuación a la llinia editorial de la revista y decidirá sobre la so publicación. Los trabayos incluyíos nesta seición evalúense editorialmente y nun se someten, con calter xeneral, al procesu ordinariu d’evaluación esterna. Sicasí, en función del calter o’l conteníu de la contribución, la Direición pue determinar la conveniencia de sometela a evaluación esterna especializada.
Reseñes bibliográfiques
La seición «Reseñes bibliográfiques» publica reseñes crítiques de monografíes, obres coleutives, ediciones y otres publicaciones d’interés pa los ámbitos científicos propios de la revista, con especial atención a les novedaes editoriales. La revista considera les reseñes bibliográfiques una contribución esencial pal diálogu académicu y anima a les persones investigadores a proponer reseñes d’obres que, pol so interés científicu o disciplinar, merezan una valoración crítica nes páxines de Lletres Asturianes.
La Direición, col sofitu del Conseyu de Redaición y del Equipu Téunicu Editorial si fixere falta, valorará si s’afaya a la llinia editorial de la revista y decidirá sobre la so publicación.
Artículos recuperaos
La seición «Artículos recuperaos» recueye una seleición de trabayos publicaos nel pasáu pola Academia de la Llingua Asturiana que, pol so valir científicu, históricu o disciplinar, constituyen aportaciones de referencia pal estudiu de les llingües, la lliteratura y la cultura asturianes.
Al traviés d’esta seición, la revista reafita’l so compromisu cola preservación y la proyeición del patrimoniu científicu que vien conformando a lo llargo de más de cuatro décades de trayeutoria editorial. Podrá, de consideralo conveniente, asoleyar estos trabayos traducíos a otros idiomes col envís d’ampliar la so circulación internacional y facilitar l’accesu de la comunidá investigadora a contribuciones fundamentales de la tradición académica asturiana.
La Direición y el Conseyu de Redaición determinarán los trabayos que s’incorporen a esta seición, que nun tien una convocatoria abierta de manuscritos.
Historial de la revista
Lletres Asturianes nació como’l Boletín de l’Academia de la Llingua Asturiana nel añu 1982. A lo llargo de la so trayeutoria, la revista convirtióse nuna publicación de referencia pal estudiu y l’espardimientu del conocimientu sobre les llingües d’Asturies. El so llabor contribuyó de manera decisiva a abrir y afitar llinies d’investigación llingüística, sociollingüística, lliteraria, didáutica, histórica o antropolóxica, ente otres, y a dar continuidá al intercambéu científicu nestos ámbitos.
A lo llargo de décades, Lletres Asturianes foi una vía fundamental pal asoleyamientu de testos históricos n’asturianu que se diben recuperando y pal estudiu del patrimoniu documental y lliterariu de la llingua. La revista punxo los medios pa qu’estos afayos llegaren a la comunidá investigadora y a la sociedá y pa que sirvieren de base pa nuevos estudios qu’aidaren ampliar la conocencia de la historia y de la tradición escrita del asturianu y l’eonaviegu.
Esta actividá investigadora convivió, en dómines estremaes, con seiciones de creación lliteraria que dieron espaciu a la escritura n’asturianu y n’eonaviegu y sofitaben la promoción y l’usu d’estes llingües. El corpus de la revista constituye, poro, un testimoniu del desenvolvimientu de la investigación y de la producción lliteraria nes llingües d’Asturies, amás d’un fondu de referencia pa la so recuperación, estudiu y espardimientu.
Nel añu 2011, nun pasu más en favor de l’accesibilidá al conocimientu, entama’l procesu de dixitalización de los 104 númberos yá imprentaos y la doble edición (electrónica y en papel) a partir del 105. El númberu 122, de marzu del 2020, ye’l primeru asoleyáu namás en formatu dixital, tres del que se desanició l’encontu físicu tradicional nun apueste pola ecoloxía, l’adautación a los tiempos y l’accesu llibre a les obres científiques que Lletres Asturianes recueye.