Los plantegamientos arrémente engañosos o inexautos constitúin un comportamientu inaceutable por non éticu.
Les reseñes y les publicaciones d’artículos profesionales tamién tienen de ser lo más ciertes y oxetives posible y los trabayos d’opinión editorial han identificase claramente como talos.

Accesu a los datos

La revista pue solicitar a los autores que se-y apurran los datos en bruto rellacionaos col trabayu oxetu d’evaluación y estos, al empar, tán obligaos a caltener los datos per un tiempu razonable llueu del asoleyamientu.

Orixinalidá y plaxu

Los autores tienen qu’asegurar que los trabayos son orixinales dafechu. Asina mesmo, habrán conseñar de mou afayadizu la procedencia de les idees o frases tomaes vierbu a vierbu d’otros trabayos yá espublizaos, acordies colo que s’indica nes normes de presentación d’artículos de la revista. El plaxu pue acoyer formes estremaes, dende facer pasar l’artículu d’otru por propiu a copiar o parafrasiar partes bultables d’un documentu (ensin referencia d’autoría dala) p’atribuyise los resultaos de les investigaciones feches por otres persones. El plaxu en toles sos formes constitúi una conducta editorial non ética y ye inaceutable.

Espublizamientu múltiple, redundante o concurrente

Un autor/ora nun ha d’espublizar, en xeneral, los trabayos que describen esencialmente la mesma investigación en más d’una revista o publicación primaria. La presentación del mesmu trabayu a más d’una revista ye, al empar, un comportamientu inaceutable por non éticu.

Reconocencia de fontes

Referenciaráse siempres de mou afayadizu’l trabayu d’otros. Los autores citarán les publicaciones que foron influyentes nel determín de la naturaleza del trabayu presentáu.
La información que s’algama de forma privada, como pue ser na conversación, correspondencia o discusión con terceros, nun s’usará ensin permisu escritu esplícitu de la fonte. La información que s’algama al traviés de servicios confidenciales, como la revisión d’orixinales o solicitúes de subvención, nun s’emplegará ensin el permisu esplícitu y per escrito del autor/ora de la obra venceyada a estos servicios.

Autoría

L’autoría llendaráse a aquelles persones que fixeron una contribución significativa a la conceición, diseñu, execución o interpretación del trabayu. Toles persones que fixeron contribuciones significatives tendrán qu’apaecer como coautores. Nel casu de qu’otros participaren en ciertos aspeutos básicos del artículu tienen que ser reconocíos o figurar como collaboradores. L’autor/ora responsable del artículu énte la revista tien que garantizar que tolos coautores tean incluyíos nel artículu y que toos ellos vieren y dieren el preste a la versión final del documentu y alcordaren la so presentación pal asoleyamientu.

Revelación y conflictu d'intereses

Tolos autores han espeyar nos sos artículos cualquier conflictu d’interés que pudiere influyir nos resultaos o interpretación del artículu. Nel so casu, indicaránse toles fontes de financiamientu algamaes pal estudiu. Los posibles conflictos d’intereses tienen que se facer públicos nes etapes primeres del procesu d’espublizamientu.

Errores importantes en trabayos asoleyaos

Cuando un autor/ora descubre un error o una inexautitú bultable nel so artículu espublizáu, ye obligación de so notificalo darréu a la Direición de la revista o la editorial y collaborar con ella col envís de correxir l’enquivocu del artículu. Si la Direición o la editorial tuvieren conocencia pente medies d’una tercer persona de qu’una obra publicada caltién un error importante, ye obligación del autor/ora iguar l’artículu o ufrir datos a la revista pa la correición del documentu orixinal.

LLABOR DE LOS REVISORES

Contribución a les decisiones editoriales

La revisión por pares ayuda a los responsables de la revista na toma de determín editorial. Esti procesu de revisión tamién ayuda al autor/ora a meyorar l’artículu. La revisión por pares ye un componente esencial de la comunicación académica formal y diz col rigor del métodu científicu.

Rapidez na respuesta

Cualquier revisor/ora escoyíu que nun se sienta cualificáu pa revisar el manuscritu unviáu, o sepa que nun va poder cumplir los plazos, pondrálo en conocencia de la Direición de la revista y dexará’l procesu de revisión.

Confidencialidá

Tolos trabayos que se reciben pa la so revisión han tratase como documentos confidenciales. Nun puen nin comentase nin amosase, a nun ser con autorización espresa de la Direición de la revista.

Criterios d'oxetividá

Les revisiones han facese de mou oxetivu. La crítica personal al autor/ora nun ye pertinente. Los evaluadores espresarán los sos puntos de vista de mou claru y motiváu.

Reconocencia de fontes

El revisor/ora identificará trabayos relevantes que conoza y que nun se citen nel artículu oxetu d’evaluación. Cualquier observación que se faiga nesti sen al autor/ora ha dir acompañada de la referencia afayadiza. El revisor/ora tamién ha poner en sabencies de la Direición de la revista cualquier semeyanza o coincidencia sustancial ente l’artículu que s’evalúa y cualquier otru trabayu asoleyáu del que tenga conocencia.

Revelación y conflictu d’intereses

La información privilexada o les idees algamaes per aciu de la revisión han ser confidenciales y nun podrán emplegase pa llograr ventayes personales. Los revisores nun puen evaluar trabayos colos que caltengan conflictos d’intereses que resulten de les rellaciones o conexones competitives, de collaboración o d’otra mena con dalgún de los autores, empreses o instituciones rellacionaes colos trabayos sometíos a evaluación.

LLABOR DEL CONSEYU DE REDAICIÓN

Decisión d’espublizamientu

La Direición de la revista Lletres Asturianes ye responsable de tomar determín sobre qué artículos unviaos a la revista y revisaos por pares tienen que s’asoleyar. La validación del artículu en cuestión y la so importancia pa los investigadores y los llectores ha empobinar siempres el determín tomáu pol o pola responsable de la revista. El Direutor/ora siguirá les polítiques del Conseyu de Redaición de la revista acordies colos requisitos vixentes en materia de llevantos, violación de derechos d’autor y plaxu.

Non discriminación

La revista dará seguranza de que los testos orixinales serán evaluaos con criterios oxetivos y científicos ya intelectuales, refugando cualquier otra consideración que cinque a la raza, xéneru, orientación sexual, creyencies relixoses, aniciu étnicu, nacionalidá o ideoloxía política de los autores.

Confidencialidá

La Direición de la revista nun revelará información nenguna sobre un testu orixinal unviáu a naide más qu’a los autores y a los revisores o posibles revisores.

Espardimientu y conflictu d’intereses

Los materiales inéditos inxertos nun testu orixinal unviáu nun podrán usase na investigación propia per parte de miembros de la revista ensin el consentimientu espresu y per escrito del autor/ora. La información privilexada o les idees algamaes per aciu de la revisión por pares ha ser confidencial y nun s’emplegará en beneficiu propiu. Cuando un miembru del Conseyu de Redaición tenga un conflictu d’intereses, seya del tipu que seya, col autor/ora o coautor/ora d’un artículu nun podrá participar nel procesu de toma de decisiones d’espublizamientu del mesmu. La Direición de la revista esixirá a tolos sos collaboradores que pongan na so conocencia los posibles conflictos d’intereses col oxetu d’iguar el problema, si fore’l casu, enantes del asoleyamientu del artículu.

Fontes remanaes:

COPE (Committee on Publication Ethics): http://www.publicationethics.org
Código de buenas prácticas científicas del CSIC. Madrid, CSIC, 2011.

Procesu de revisión por pares, doble ciegu, pal espublizamientu d’artículos

Según se conseña nes normes de presentación de trabayos de la revista, los trabayos evaluaránlos anónimamente dos revisores esternos. Si fore necesario, unviaránse a un tercer revisor/ora. N’última instancia, sedrá la Direición de la revista la que decida sobre’l so espublizamientu.

Caún de los evaluadores fadrá un informe motiváu qu’especifique les razones pa l’aceutación, igua o refuga del orixinal que se somete a la so consideranza, acordies coles pautes del formulariu de revisión de la revista. En tol procesu daráse seguranza del anonimatu tanto de los autores como de los evaluadores.

El tiempu mediu trescurríu dende l’unviu del orixinal hasta la comunicación al autor/ora del resultáu de la evaluación nun pasará de 4 meses, sacantes circunstancies imprevistes.

Los criterios básicos d’evaluación sedrán los que vienen darréu:

1.- Axustamientu a les llinies temátiques de la revista.

2.- Grau d’orixinalidá y relevancia científica de la contribución (tema, métodu, datos, resultaos, etc.).

3.- Valir científicu y metodolóxicu.

4.- Usu de bibliografía actualizada.

5.- Organización de los conteníos y bon usu llingüísticu.

6.- Adautación a les normes d’espublizamientu de la revista.

7.- Conveniencia del artículu en rellación cola llingua y la lliteratura asturianes entendíes nel sen más ampliu posible.