Equipu editorial

Organización y responsabilidaes

La organización editorial de Lletres Asturianes estructúrase per aciu de los distintos órganos responsables de la direición, xestión y asesoramientu científicu de la revista. La responsabilidá editorial y la garantía académica de la publicación recaen na Direición, la Secretaría, el Conseyu de Redaición, el Conseyu Científicu Asesor y l’Equipu Téunicu Editorial de la revista, que tien funciones de coordinación, edición, xestión editorial y sofitu téunicu nel procesu d’espublizamientu. La composición actualizada d’estos órganos figura na información institucional de la revista, amás d’espeyase más abaxo.

La Direición, el Conseyu de Redaición y l’Equipu Téunicu Editorial de Lletres Asturianes son responsables de la calidá científica, la coherencia editorial y el cumplimientu de los principios éticos que rixen la publicación. Les decisiones editoriales han tomase con criterios d’independencia académica, imparcialidá y valoración científica de los trabayos presentaos, ensin que les condicionen por razones personales, ideolóxiques, institucionales, llingüístiques, relixoses, d’orixe, xéneru, orientación sexual o cualesquier otra circunstancia ayena al valir académicu y científicu de les contribuciones.

La revista fadrá por caltener una representación plural ya igualitaria na composición de los sos órganos editoriales y na seleición de les persones que participen nos procesos d’evaluación científica, acordies colos criterios de competencia académica, diversidá investigadora, igualdá de xéneru y pluralidá institucional.

La Direición y la Secretaría de Lletres Asturianes escuéyense en xunta ordinaria d’Académicos de l’Academia de la Llingua Asturiana (ALLA), ente persones que tengan la condición d’académiques de númberu de la institución. La seleición atiende a criterios de competencia científica, especialización disciplinar, conocimientu de los ámbitos d’investigación propios de la revista y trayeutoria académica personal y venceyada a la propia revista.

La composición del Conseyu de Redaición y del Conseyu Científicu Asesor determínase de común alcuerdu ente la Direición y la Secretaría de la revista y la Presidencia de l’ALLA, atendiendo a la especialización, los conocimientos y la trayeutoria investigadora de les persones propuestes, asina como a les necesidaes científiques y editoriales de la publicación. Pol calter especializáu de Lletres Asturianes y la so condición de revista científica d’una institución académica, la renovación d’estos órganos nun respuende a una periodicidá predeterminada, sinón que se lleva alantre cuando les necesidaes de funcionamientu, actualización o representación científica de la revista lo xustifiquen.

Persones que conformen l'equipu editorial

Direutora

• Ana María Cano González (ALLA; Universidá d’Uviéu, España)

Secretariu

• Xosé Ramón Iglesias Cueva (ALLA, España)

Conseyu de Redaición

Conseyu Científicu Asesor

Equipu Téunicu Editorial

L’Equipu Téunicu Editorial de Lletres Asturianes confórmenlu los trabayadores de la Estaya de Llingua y Lliteratura de la Secretaría Téunica de l’Academia de la Llingua Asturiana. El responsable d’esti órganu y contautu principal pa la xestión editorial de la revista ye Marcos Martínez Fernández, encargáu d’edición na institución.

Independencia editorial

L’ALLA, entidá editora de la revista, respeta la independencia académica y editorial de Lletres Asturianes. D’esta miente, el sostenimientu económicu y téunicu de la revista intégrase nos recursos institucionales de l’ALLA y nos mecanismos de cooperación establecíos con otres instituciones (Universidá d’Uviéu y portal OJS de revistes científiques «REUNIDO»), ensin que les fontes de financiamientu o’l sofitu recibíu puean condicionar los procesos d’evaluación nin los determinos editoriales.

La seleición de les persones evaluadores y el sistema d’evaluación desenvuélvense na información que s’apurre en REUNIDO nel subapartáu «Procesu editorial y evaluación» del apartáu «Política editorial y ética».

Incidencies y reclamaciones

Les reclamaciones, incidencies o pidimientos d’aclaración tendrán de presentase pelos canales oficiales de comunicación de la revista al traviés del contautu d’asistencia y xestión editorial y habrán incluyir una esposición razonada de los fechos y de los motivos nos que se basen. Una vegada se reciban, l’Equipu Téunicu Editorial treslladaráles a la Direición y, cuando proceda, al Conseyu de Redaición, que podrán solicitar aclaraciones o documentación complementaria y darán a les persones implicaes la oportunidá d’apurrir les sos considerances.

La Direición y el Conseyu de Redaición analizarán cada situación con imparcialidá y confidencialidá y comunicarán a les partes implicaes un determín razonáu, indicando, cuando se precise d’ello, les actuaciones editoriales que resulten del mesmu. Les persones de los órganos de la revista que puean tar implicaes na cuestión plantegada o que tengan un conflictu d’interés tendrán de quitase de participar na so valoración y resolución.