La revista Lletres Asturianes manifiesta’l so sofitu a les polítiques de xéneru empobinaes a consiguir una igualdá sustanciosa ente muyeres y homes na sociedá. Poro, acordies con esti compromisu, Lletres Asturianes inxerta les siguientes indicaciones.

Recomiéndase dafechamente que los artículos que s’unvien pa la so publicación empleguen un llinguaxe inclusivu y non sexista, promoviendo asina la igualdá de xéneru nel ámbitu científicu. Esta recomendación ta alliniada colos oxetivos establecíos na axenda del Espaciu Européu d’Investigación (ERA) pal periodu 2022-2024, n’especial acordies col so númberu 5, creáu pa “Promover la igualdá de xéneru y fomentar la inclusión”.

Nesi sen, convídase a los autores a consultar y aplicar les indicaciones que se describen na Guía práutica de llinguaxe inclusivu y con perspeutiva de xéneru ellaborada pola Universidá d’Uviéu.

D’esta miente, Lletres Asturianes pon el so enfotu n’algamar una representación equilibrada de muyeres y homes, mesmo na fechura del so Equipu Editorial como nel coleutivu de revisores encargaos de la evaluación de los manuscritos.

Va requerise de los y les autores que s’apurra información esplícita sobre si se considera’l sexu na recopilación y análisis de los datos d’investigación. Esti requisitu tien como finalidá facilitar la identificación de posibles diferencies de relevancia. Asina mesmo, establezse l’inxerimientu del nome completu de tolos autores nos trabayos que se publiquen.

La revista reconoz la diversidá arreyada a los testos académicos y la posibilidá d'incluyir ciertes adautaciones llingüístiques orientaes a la igualdá. Compréndese, amás, que la promoción de la igualdá tresciende los aspeutos puramente morfolóxicos del llinguaxe. Sicasí, ha d’asumise que la llingua asturiana dispón de recursos y mecanismos abondos pa la espresión d’idees de manera inclusiva y non sexista, col envís de permitir a los emisores del mensaxe escoyer formes d’espresión que contribuyan al cambéu social.

P’ampliar la información sobre esti tema, ye de consultar el documentu de recomendaciones de redaición inclusiva de l’Asociación Americana de Psicoloxía (APA), disponible en: https://apastyle.apa.org/style-grammar-guidelines/bias-free-language.   

Dende la perspeutiva d’esta revista, considérase que la inversión d’un primer esfuerzu na ellaboración de los testos de los artículos reflexaráse dafechu nun avance de gran significancia pa la sociedá nel so conxuntu. La comunicación científica nun pue quedar a un llau de les tresformaciones que se producen nel contestu social que la sofita.