L’asturianu y l’inglés en contraste: sobre los temes suspendíos

Resume

L’artículu aborda l’analís sintácticu dende una perspeutiva xenerativista tresformacional de los tópicos colgantes o suspendíos, tamién llamaos dislocaciones a la izquierda, n’asturianu y n’inglés, una estructura periférica en dambos sentíos del axetivu: per un llau, son sintagmes nominales que presenten el tema o’l suxetu de la predicación, o qu’ufren un marcu del que parte la enunciación que los sigue, y que polo tanto apaecen na parte más periférica o izquierda de la oración; per otru llau, son construcciones perifériques (o non canóniques) en tanto que se consideren parte de la llingua oral o informal, y, con talu motivu, fueron tradicionalmente escluyíes de les gramátiques de tipu más normativista. Por embargu, el so interés pa la sintaxis ye incuestionable. L’artículu ufierta una batería d’argumentos empíricos del asturianu y del inglés que lleven a la conclusión inevitable de que, magar les apariencies superficiales, el tópicu colgante y la secuencia anfitriona cola que coocurre formen parte de dos oraciones independientes, rellacionaes ente sí de forma paratáutica. Poro, les dislocaciones son elementos estraoracionales y el comportamientu sintáuticu observáu ye precisamente l’esperáu: el de dos oraciones xeneraes de manera autónoma. L’artículu trata amás d’un contraste intrigante ente l’asturianu y l’inglés en rellación colos tópicos colgantes n’oraciones subordinaes: mientres que n’inglés los tópicos colgantes dependientes puen asoceder con un complementante that reduplicáu o non, n’asturianu, al igual que n’español, los tópicos suspendíos subordinaos apaecen con un complementante que secundariu. Del mesmu mou, l’asturianu ufierta datos qu’amuesen la posibilidá d’un recomienzu llibre ensin verbu subordinante. Amuésase una vegada más qu’un analís de la reduplicación del complementante que presuponga dos oraciones soxacentes ente bastidores ye superior a les alternatives monooracionales existentes na lliteratura. L’analís fai una serie de predicciones empíriques correutes.