Porque non tolos porque son iguales: la subordinación causal en asturiano: La subordinación causal en asturiano

Resume

Un trazu distintivu del asturianu ye la diferente posición na que’l pronome átonu se manifiesta nos contestos matrices. Nesti artículu, vamos un pasu más allá y discutimos un fenómenu muncho menos estudiáu, como ye la presencia d’estes mesmes alternancies nos contestos subordinaos encabezaos pol nexu «porque». Al contrariu de lo que s’asume xeneralmente, una pausa entonativa pa dar cuenta de la enclisis nestos contestos subordinaos nun esplica la enclisis, yá que dicha pausa nun s’atopa nos datos de corpus orales. Lo qu’argumentamos ye que la enclisis nesti contestu subordináu dase como resultáu de la interpretación que conlleva la oración subordinada, asina como de la so estructura interna. Distinguimos dos tipos d’oraciones causales introducíes por «porque» n’asturianu, «subordinaes del enunciáu» y «subordinaes de l’enunciación». Sin embargu, más qu’enfotanos nes diferencies esternes pa estremar estos dos tipos, centrámonos nes diferencies de les sos estructures internes. Argumentamos qu’un «porque» siempre da llugar a un asertu, polo qu’esti nexu manifiéstase nel nucleu Fuerciaº na periferia izquierda, l’otru «porque» puede o non dar llugar a un asertu, y, polo tanto, puede manifestase en Fuerciaº o en Finitúº. Les diferentes posiciones que puede ocupar «porque» dan cuenta de forma natural de les alternancies enclisis/proclisis que s’atopen. Si «porque» apaez en Fuerciaº y polo tanto se codifica un asertu na oración subordinada, la enclisis manifiéstase cuando nun hai un elementu que permita la proclisis. Si nun se presenta un asertu, «porque» manifiéstase en Finitúº na periferia izquierda, lo que bloquea’l movimientu del verbu y xenera exclusivamente proclisis. Esti análisis da cuenta mesmo de les diferentes interpretaciones que se dan nes oraciones introducíes por «porque» que de la posición na que topamos el pronome átonu. Cierra esti artículu una curtia güeyada a cómo estos dos tipos de «porque» s’estremaben históricamente con diferentes nexos, mostrando asina la relevancia que tien l’asturianu nes discusiones llingüístiques, ya que tanto los datos como les estructures internes afayaes nesta llingua son úniques y claves pa entender estos contestos subordinaos.