Númberu actual
Lletres Asturianes, revista científica de l’Academia de la Llingua Asturiana, asoléyase dende 1982 y publica investigaciones orixinales sobre les llingües, la lliteratura y la cultura d’Asturies y la so rellación col ámbitu románicu. Agospia tamién estudios interdisciplinares sobre l’asturianu, l’eonaviegu y les sos manifestaciones culturales, n’ámbitos como la filoloxía, la sociollingüística, la didáutica, la traducción y l’antropoloxía llingüística. La so coleición histórica, disponible n’abertal en formatu dixital dende’l primer númberu na páxina web de la institución, amuesa más de cuatro décades d’actividá investigadora nestos ámbitos. En 2011 entamó la edición electrónica, que convivió cola impresa hasta’l 2020, momentu nel que la revista pasó a espublizase dafechu en formatu dixital a partir del númberu 122. Los conteníos espublizaos en Lletres Asturianes son responsabilidá de les persones autores.
La revista espublízase semestralmente (marzu y ochobre) n’accesu abiertu diamante y ensin costes pa les persones autores nin llectores. Los artículos de la seición «Trabayos d’investigación» pasen per una evaluación esterna por pares en réxime de doble ciegu, fecha por persones especialistes ayenes a los órganos editoriales y científicos y ensin conflictos d’interés.
e-ISSN: 2174-9612 / ISSN: 0212-0534